للأرقام فى العامية المصرية إستخدامات مختلفة ومحددة جداً فعلى سبيل المثال :__
(٦٠ ) يستخدم رقم ٦٠ فقط وحصرياً دوناً عن باقى الأرقام فى الشتيمة زى مثلاً “إبن ٦٠…..” ومفيش حاجة أبداً إسمها “إبن ٥٠…..” ولا “إبن ٧٠ ……” هما ٦٠
أما لو حد بشع جداً وعايزين نضاعف له الشتيمة أضعاف كتيرة فبنعمل إيه؟!
مش بنقول رقم أكبر من ٦٠ وخلاص .. لأ .. إحنا بنجيب الـ ٦٠ بتاعتنا عادى ونضربها فى ٧٠ فبيبقي “إبن ٦٠ × ٧٠”
يستخدم رقم ٦٠ أيضاً لوصف أسوأ مكان أو وجهة
فمثلاً نقول “أهو غار فى ٦٠ داهية” وعمر ما حد غار فى ٨٠ داهية مثلاً أبداً ماحصلتش
(٣٠) يستخدم رقم ٣٠ حصرياً لوصف شخص أو شئ عديم المنفعة فنقول :
“ده واد مالوش أى ٣٠ لازمة”
“روحت خروجة مالهاش أى ٣٠ لازمة”
والمُلفت للنظر إن مفيش أى حاجة فى الدنيا لها ٣٠ لازمة!!
تستخدم فى العامية ١٠٠ ١٠٠ لوصف الحالة الجيدة ..
“أنا تمام يامعلم الحمد لله وكله ١٠٠ ١٠٠”
أو “لا آكل إيه تانى أنا كده ١٠٠ ١٠٠”
أما ١٠ على ١٠ فتستخدم لوصف جودة الأشياء فنقول “شوية شاى ١٠ على ١٠” .
(١٠٠٠) يستخدم رقم ١٠٠٠ تحديداً فى مناسبات ثابتة …
فى المباركة “١٠٠٠ مبروك” مفيش ١٠٠ مبروك مثلاً.
فى الإحتفال الحماسى “يا ١٠٠٠ نهار أبيض” برضوا مفيش ١٠ نهارات بيض مثلاً ولا حتى” مليون نهار أبيض” هما ألف فى كل حتة !!
و فى الترحاب “يا ١٠٠٠ خطوة عزيزة” ودى بالنسبالى جملة مبهمة جداً يعنى دى خطوة عزيزة بمعنى إنها زيارة نادرة الحدوث إنما دى ١٠٠٠ خطوة عزيزة يعنى ألف زيارة نادرة الحدوث إزااااى؟!
وطبعاً لما نحب نشكر حد أوى بنقول “١٠٠٠ شكر” بالعدد، و لما عيان يخف أو مسافر بيرجع نقوله ١٠٠٠ حمدالله على السلامه.
(٧) يستخدم رقم ٧ فى وصف حاجة غريبة جداً الحقيقة وهى اللوصة أو الإنهاك المُحير .. !!
“ده أنا دوخت الـ ٧ دوخات لحد ما لقيتك” أو “لفيت السبع لفات”
كما يستخدم رقم ٧ للتعبير عن النوم العميق..
“مش هايرد عليك ده شكله رايح فى سابع نومه”
على أساس إنه لو فى سادس نومه كان قام عادى!!
(٥) هى وحدة قياس فضفاضة جداً وتعنى فى العامية المصرية خمس دقايق وتستخدم فى وصف الإنتظار أحياناً “استنانى ٥” أو فى وصف حوار سريع
” هكلمك ٥ بس أشرحلك” أو لوصف الأستراحة
“أقعد ٥ بس خد نفسك”
(١) فى وصف الوقت الثانية بتبقى واحدة
“ثانية واحدة بس ألبس الجزمة وأنزلك” ….
بس الدقيقة تحتمل ١ و٢ و ٣
“دقيقة واحدة وهبقى معاك” أو “إدينى دقيقتين وهبقى معاك” أو ” أنا هشرحلك كل حاجة فى ٣ دقايق”
(٢) أطول مدة زمنية فى الكون هى “الساعتين _ ٢” فنقول
“قعدت تحكيلى ساعتين عن إبنها إللى بدأ يسنن”
بينما أقصر كلام هو إللى يتقال فى “كلمتين _ ٢” فنقول
“هما كلمتين ورد غطاهم” !!
الشخص المحتاس ده بقى إللى تلاقيه قاعد يضرب أخماس فى أسداس ودى بالنسبالى عملية معقدة جداً جداً
وإللى مالوش عند حد حاجة محدش يقدر يقول له تلت التلاتة كام إللى هو ١ عادى …محدش يقدر يقول له ١ مثلاً يعنى
حسبة ملهاش أى ٣٠ لزمة
جريدة الفكر الحر 