قصة أغنية
بقلم / عبده مرقص عبد الملاك
من شاهد فيلم شفيقة و متولى لابد أنه استمع لأغنية ( بانو بانو ) من كلمات الشاعر الراحل ( صلاح جاهين ) و أداء الفنانة سعاد حسنى و قد وظفت الأغنية كأنها تأتى فى سياق الفيلم لتواكب أحداثه و بالرغم أنها كانت منسجمة مع أحداث الفيلم و لكن فى الواقع هذه الأغنية كتبت خصيصاً لسعاد حسني و بناء على طلبها من صلاح جاهين و تروي ذلك السيدة قرينته فى ( كتاب حياة صلاح جاهين بقلم زوجته منى قطان)
رن هاتف المنزل الساعة الخامسة عصرا…
ألو….. صوت حزين هادئ صامت حاد مرتجف
منى قطان : ألو يا سوسو (كما تحب سعاد حسني أن يلقبها المقربين) عاملة ايه!؟
سعاد : كويسة ممكن تبلغي أستاذ صلاح اني هجيله الساعة ٣ الفجر عاوزاه في كذا حاجة كده… وأغلقت المكالمة في صمت و غموض .
أصبحت الساعة الرابعة و النصف فجرا دق جرس الباب و إذا بها سعاد كما لا يعرفها الجمهور بدون مساحيق تجميل أو بواريك للشعر أو ابتسامة .
جلست في صمت لمده عشر دقائق حتى توجهت بالكلام لصلاح جاهين
(صلاح .. أنت عارف كل اللي وجعوني و أذوني في حياتي وعارف مين باعني و مين استغلني و أنا قلبي اتحرق من مين .. انا عاوزة منك كلمات أدي بيها كل اللى تعبونى بالقلم .. عاوزه أعرفهم أنهم ولا حاجة يعني عاوزة أغنية لسعاد الغبية الهبلة اللي صدقتهم .. أنا مش هطول .. أنا بس كنت مخنوقة وحابة أصرخ في أغنية)
غادرت سعاد المنزل سريعا و أمسك صلاح جاهين بقلمه ليعبر عن مشاعر سعاد و صرختها فى وجه ظالميها .. وبعد يومين فقط خرجت أغنية( بانو بانو ) ..من ألحان الموسيقار / كمال الطويل
و إليكم كلمات الأغنية :
بانوا بانوا بانوا.. على أصلكوا بانوا
والساهى يبطل سهيانه
ولا غنى ولا صيت.. دولا جنس غويط
وكتاب ما يبان من عنوانه
بانوا.. أيوه بانوا
جربنا الحلو المتعايق أبو دم خفيف
وبقينا معاه أخوة شقايق فاكرينه شريف
اتاريه مش كدة على طول الخط
الطبع الردى من جواه نط
خلاص بقى مهما انشال وانحط ..
مافيش دمعة حزن عشانه
بانو .. ايوه بانو
وعرفنا سيد الرجاله
غرفنا عين الاعيان
من بره شهامة واصالة تشوفه تقول اعظم انسان
انما من جوه يا عينى عليه
بياع ويبيع حتى والديه
واهو ده اللى اتعلمناه على ايديه
القهر وقوه غليانه
بانو .. ايوه بانو
دوروا وشكوا عني شوية كفاياني وشوش
دا أكم من وش غدر بيا ولا ينكسفوش
وعصير العنب العنابي
نقطة ورا نقطة يا عذابي
يكشف لى حبايبى واصحابى
يوحدنى وانا ف عز شبابى
القلب على الحب يشابي
والحب بعيد عن أوطانه
بانو أيوه بانو
بانو بانو بانو
على أصلكو بانو
أهو كده بانو
على أصلكو بانو
مع تحياتى
عبده مرقص عبد الملاك
جريدة الفكر الحر 