أيمن موسى يكتب ازاي تبقى ترند


إزايتبقىتريند

مقال ساخر بالعامية المصرية
ـــــــــــــــــــــــــــــ
قوم ذاكر يا حبيبي.
ليه يا بابا بس كده؟
علشان تنجح يا حبيبي وأشوفك حاجة حلوة لمَ تكبر.
يعني لو ذاكرت وتعبت هستفيد إيه بس يا بابا وهكسب كام؟
هتستفيد إنك تكون شخص محترم وناجح بالحياة وكمان معاك فلوس كتير.
طيب ما انا ممكن أبقا شخص ناجح ومعايا فلوس كتير من غير مذاكرة وتعب وعكننة.
إذاي بقا يا فالح؟
ألعب كورة مثلًا يا بابا وبكده هبقا مشهور ومعايا فلوس كتير أوي أوي.
بس الكورة موهبة يا غلباوي ومش أي حد عنده الموهبة دي وإلا مصر كلها كانت بقت ملعب والشعب كله بيلعب كورة.
ما هو لو كنت سمعت كلامي وتسيبني ألعب كل يوم ولو حتى 12 ساعة كنت شفت الموهبة اللي عندي وكنت هثبتلك إني مو صلاح بتاع العيلة دي.
يعني بتتهمني إني ضيعت مستقبلك! طيب سيبك من الشهرة والفلوس وقوم ذاكرك كلمتين يمكن ربنا يكرمك وتطلع عالم أومخترع عظيم وتخدم البشرية بحاجة مفيدة ووقتها الفضائيات تعمل معاك لقاءات وتبقى نجم.
برضو دي مش محتاجة مذاكرة وتعب خالص وشكلك كده يا بابا مش عارف حاجة وفاهم الشهرة غلط.
لا والله أنا معنديش فكرة طيب رسيني ربنا يكرمك يا شيخ.
ما هو أنا يا بابا ممكن أطلع مغني مهرجانات زي عمو حمو بيكا وأونكل شاكوش وعمو عمر كمال ووقتها هتشوفني ع التلفزيون 24 ساعة وكمان هتكرم واخد وسام وعربية بينتلي من الخليج.
لا حول ولا قوة إلا بالله يعني مفيش فايدة فيك يا بني يا حبيبي ومش هعرف أقنعك؟
هو إنت بتقفش ليه بسرعة يا بابا مش دا مستقبلي واحنا بنتناقش فيه ولا دا كمان غلط وعيب وحرام؟
لا يا سيدي مش عيب ولا حرام وسيبك من الشهرة والفلوس وقوم ذاكر واقرا كتير وثقف نفسك علشان تنجح وممكن ربنا يكرمك وتطلع كاتب ولا شاعر ومين عارف مش يمكن تاخد جايزة عالمية وتبقا ترند.
يا سلام يا بابا وهو أنا علشان أبقا تريند لازم أذاكر بالساعات وأتعب مخي وعيوني وأضيع مستقبلي؟
أومال هنبقى تريند إذاي يا فالح؟
ههههه دي حاجة بسيطة أوي أوي خالص يا بابا مش قلتلك إنك فاهم المجد والشهرة غلط.
لا والله بسيطة إذاي يعني؟ نورني يا حبيبي ربنا ينور بصيرتك وقولي طريق المجد والشهرة نمشيله منين مش يمكن تقنعني ونمشيه سوا.
شوف بقا يا بابا عارف السطوح بتاع عمتو اللي فوق؟
أه يا سيدي عارفه ماله السطوح بتاع عمتو بموضوعنا بقا.
اصبر بس وهفهمك كل حاجة.
اللهم صبرا وقوة أديني صابر يا ننوس عين أمك قول بقا.
شفت بقا العشة اللي على السطح؟
أيوه يا سيدي عارفها وشفتها وياما أكلنا على قفاها.
مش العشة دي فيها فراخ ووز وبط؟
أيوه يا سيدي وكمان حمام وديوك رومي.
لا لا سيبك من كل دا إحنا بس هنحتاج منها بطة حلوة وكلبوظة وأنا هاخدها وأسربها بالشارع قال إيه وكأنها تايهه وبعدين أنا أجري وراها بالشوارع والحواري وأعمل نفسي بدور عليها بعد ما أسميها حسناء أو أسماء أو هناء وممكن علياء أو حتى ألاء المهم أي إسم يكون أخره ااااااااااااء علشان القافية وبكده هبقا تريند وأطلع على MBC كمان مع عمو شريف عامر.
يا سلااااااااااااااااام.
أه والله شفت بسيطة إذاي يا سي بابا.
بابا بابا سايبني وطالع من البيت ليه هو أنا زعلتك في حاجة؟
لا يا حبيبتي أنا طالع السطح أجيبلك بطة من بتوع عمتك..

وجهةنظرطفل_مفعوص

ليهأذاكروممكنأبقاتريند

إذاينقنعأولادنا_يذاكرو

بلاشتصدرواالهيافة

وخداناورايحةعلى_فين

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة أكيسميت للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.