حكاياتك
حنان العسيلي
بتحايل على نفسي وبكدب
لما بكون في دموعي غريقة
وبدور على روحي وبضحك
وبقول بكرة تروح الضيقة
وبفتش في حكاوي قديمة
وعلى أنيني بزرع ورد
وبروح أحبك بيني وبيني
وفي حنية قلبك عيشت
ولما في يوم يغلبني حنيني
بجري يا جدي على الشباك
وأستناك كده تيجي تاخدني
وتوديني أركب مرجيحة
أو تشاور لي أنزل لك جري
علشان تديني البونبوني
في حواديتك أنا يا ما سهرت
وعلى بابك جريت ولعبت
يوم ما مشيت ما بكيتش عيوني
علشان روحي رفضت بُعدك
ولما سماك هنا فِضيت جنبي
حفر اسمك حدوتة في قلبي
عارف ليه زعلانة أنا منك؟
علشان مشيت من غير ما تقول لي
وإيه مخليني بصالح زعلي؟
حكاية في يوم سمعتها منك!
جريدة الفكر الحر 