الكاتب أيمن موسى يكتب إزاي تبقى تريند

{نصيحة عمتي} مقال ساخر
{شَعر شيرين وجوز ياسمين}
ـــــــــــــــــــــــــــــــــــــــــــ
أنا خارج يا عمه تحبي أجيبلك حاجة وأنا راجع؟
ترجع بالسلامة يا حبيبي متنساش وأنت راجع تشتري ربطة جرجير من خالتك جمالات اللي فارشة أول الشارع.
حاضر يا عمه انتي تؤمري يا ريحة الحبايب.
ألا قوليلي يا عمه هو ليه الست ممكن تحلق شعرها زيرو؟
يا ساتر يارب دي تبقى كارهة وبايعة يا ضنايا ومش باقية على حاجة.
هو انتي سمعتي عن شيرين يا عمه؟
شيرين بت الأسطى شعبان جارنا ؟
لا يا عمه شيرين عبد الوهاب.
يعني بت حد نعرفه يا ولدي ؟
شيرين اللي بتغني يا عمه.
قصدك شيرين آه يا ليييل يا حبيبي ؟
أيوه هى بشحمها ولحمها يا عمتي.
وهى عملت ايه؟
حلقت شعرها زيرو واتطلقت من جوزها وبقت ترند يا عمه.
وهو البتاع دا اللي ميتسماش {تريند} حاجة حلوة ولا وحشة يا ضنايا؟
مقولكيش يا عمه دا حاجة كده تخلي الواحد يتشهر بين يوم وليلة ويبقى بالسما وسيرته على كل لسان.
يا ساتر يارب وهى دي حاجة تتقال ولا تفرح حد يا حبيبي يلا ربنا يسترنا من الفضايح دنيا وآخره بس على العموم شوف يا ضنايا الست لما تتقهر تعمل اي حاجة متخطرش على بال حد وشعر الست زي ما الناس كلها عارفه تاج راسها ومتستغناش عنه إلا للشديد القوي بس مقولتليش يا ضنايا هى بقت البتاع دا {تريند} إذاي؟
اسكتي يا عمه مش كل الستات والبنات وكل تاء النسوة اتعاطفو معاها وخلوها تريند حتى الرجالة ركبوا الموجة وعلو الترند.
يعني ملاقوش غير خراب البيوت والفضايح علشان يخلوه البتاع دا {تريند} اللي بتقول عليه يا حبيبي.
لا يا عمه هو أنا مقلتلكيش مش شرط التريند يكون فضايح وممكن أي حاجة حلوة تبقا تريند والدليل على كده إن ياسمين كمان بقت تريند.
ياسمين! ومين ياسمين دي يا حبيبي؟
معقول يا عمه مسمعتيش عن ياسمين مرات العوضي؟
ودول بقوا البتاع دا {تريند} بعد ما اتطلقوا وفضحو بعض ولا حد قتل التاني ولا ايه يا حبيبي؟ نورني روح إلهي ينور طريقك يا نور عيني.
لا يا عمه ولا أي حاجه من دول دي هى بس تعبت شويه وهو وقف جنبها وطلعو بالتلفزيون يتغزلوا ببعض واشي حب وغمزات وحكايات قوم إيه بقا الناس كلها حبتهم والستات اتمنت اجوازها تبقى زي العوضي في حنيته والرجالة كمان بيدعو ربنا ستاتهم تبقى ياسمين بس للأمانة يا عمه الرجالة منقسمين بموضوع ياسمين وبعضهم عايزين مراتاتهم {ياسمين عبد العزيز} والقسم التاني عايزين ستاتهم {ياسمين صبري} ما علينا يا عمه مش ناقص توريط بس من الأخر كده ياسمين والعوضي بقو تريند .
شوف يا حبيبي يمكن أنا ست كبيرة ومليش بالتلفزيون والبتاع دا {تريند} بس أعرف بالأصول كويس أوي أوي والست شيرين آه ياليل مش أول واحدة ولا أخر واحدة تتقهر وتحلق شعرها من الخنقه حتى ولو كانت لسه بتحب جوزها حلاقة شعرها بقا حرام أو حلال ملناش دعوه وكمان الست ياسمين وجوزها منهم كتير بيشيلو بعض وقت الأزمات وهى دي الأصول وعمرنا ما سمعنا عنهم حاجه .
بس يا عمه الناس ملهاش سيرة غير شيرين وياسمين والكل مركز معاهم.
شوف يا حبيبي أنا مش ضدهم وبدعيلهم ربنا يكرمهم ويسعدهم بس في ناس كتير أولى منهم إن الناس تركز معاهم.
زي مين يا عمه؟
هقلك يا حبيبي عارف خالتك جمالات اللي فارشة أول الشارع وهتشتري منها الجرجير دي ست مكافحة بعز الصيف بتجري على لقمة عيشها وبالشتا وتحت المطر والسقعه بتلاقيها بالشارع بتبيع وتشتري علشان متمدش ايدها وتتسول من حد جمالات بقا جوزها مات وساب برقبتها ست عيال ربتهم وكبرتهم وعلمتهم جوزت البنات واطمنت عليهم ووقفت جنب ولادها ووصلتهم لبر الأمان ولحد دلوقتي رافضة تستريح بالبيت ودي وغيرها كتير أمهات مطلقات وأرامل تحملو قسوة الظروف ونظرة الناس الوحشة ليهم من غير ما يشتكو أو يهربوا من المسؤولية واللي زيهم كتير وهما اللي يستاهلو إن الناس تركز معاهم وتخليهم البتاع دا {تريند} اللي بيشهر الناس يمكن حد يحس بيهم ويكرمهم ويحسسهم ان جهدهم مرحش بلاش.
والله معاكي حق يا عمه بس نقول ايه بقا الناس بقت بتيجي بالهايفة وتتصدر وياما ترندات مزيفه شغلت تفكيرنا واخدت وقتنا وبقت قدوة لبناتنا وأولادنا..
في نهاية حديثي الإفتراضي مع عمتي يارب تكونو إستمتعتم بيه بس وللأمانة أحب أعترف لكم إعتراف صغير وهو إني معنديش عمه لأني وللأسف محروم من العمه وللأسف لم أجرب إحساس أن يكون لي عمه وربما لذلك إخترت أن تأتي النصيحة على لسان عمتي التي أفتقدت وجودها منذ ولادتي ..
دمتم وأحبتكم بخير..