جراحي يكتب – يهل العام –
يهل العام و نتفاءل
و نرسم سهم جمب القلب
و نبعت ورده للغايب
و نستني يعود بالحب
و ندعي الله يدوم الخير
مابينا و نتملي بالوِد
لا عاد لينا اللي كان غايب
و لا عتر الغريب علي أرض
و لكن كل عام برضه
بنزرع ورد في كفوفنا
نهادي بيه غريب و قريب
و نحصد شوك علي رموشنا
لا بطلنا نحب الناس
و لا عيوبهم دي هتحوشنا
هنفضل نبتدي بالخير
كـموج النيل بيِوفي الوعد
سلامي لكل واحد حيّ
يقيم ف عينيك بلاد الضيّ
تحب الخير لكل الناس
و يلقوك في عطشهم ريّ
سلامي لعيلين حلوين
سوا صاحيين سوا نايمين
لو الدنيا تدوم خضره
أكيد اتمني ليكو اتنين
لكن يا عيال مهيش علي حال
و لا بتعمل حساب لكبار
عشان تعمل حساب لعيال
فخليكوا عيال حلوه
و خليكوا كبار شاطرين
و دايما بصوا للجنه
مبدخلهاش غير الحلوين
سلامي للي جاي مني
يا عالم راح يلاقيني
يا عالم اشوفه بالنني
يا عالم هو مش طالع
و كان حلم اتسرق مني
صحيت م النوم و انا موهوم
أسير هايم علي الطرقات
اقول كان فيه و راح مني
سلامي إليه كبير برضه
ماهو كان زرعي و انا أرضه
و حال الزرع .. يا يزهزه
يا ييـبس عوده من غُلبُه
سلامي يا وردة الأحلام
لكل نصيب دواه و سَعدُه
و أول يوم في عام جايلي
و انا يمكن ماشوفهوشي
بودع نفسي و بسلم
علي فصولي و علي حُوشي
و علي الدِكه اللي غلبتني
و عاشت هي يوم موتي
سلامي لكل حرف اتقال
و علم جوه مخ عيال
بتاخد مني كل خيال
و انا فاكرهم مافهموشي
سلامي للعلم و نشيد
محدش قاله من قلبه
ماهو معلش برضه العيد
بيحتاج فرح يوم قبله
سلامي للعسل سُكَر
لتباريحها و تفاريحها
لا ببعد عنها و لا هقدر
اعيش فيها و اموت ريحها
سلامي يا حلوه متخليش
في وشك ذره من خوفي
و خوفي ان كان لابد يعيش
لا يمكن يؤذي ملامحها
أموت فيها تعيش فيا
ادوق بيها الخلود كله
يهل العام و انا معاها
يهل العام و انا لوحدي
اكيد هتقولني في دعاها
ده وعدها ليا و ده وعدي.
جريدة الفكر الحر 
💚💚💚💚
إعجابإعجاب