- التفاصيل –
مَتتكوش على التفاصيل
محدش خالي مِ الأحمال
كلام الليل سيبوه لليل
ده كل عليل ضلامُه بحال
ومَتخلوش غباء الكلمة
يتحكم في قلب الناس
لو الألفاظ تكون حلوة
هَتلقوا الكل بقى حَسّاس
هتسألني عن امبارح
هقولك مُت ثُم صحيت
وليه حزنان وليه فارح
وليه ساكت وليه ضحيت
وليه اللون على عيونك
وليه بتخونك المواعيد
وليه وازاي وامتى وفين؟
كلام تفاصيل متتفسرش
سيبونا نعيش كروح النيل
بيرمي همومه جوه الشَط
لا قال ليه أنزل المالح
ولا قال مُوجي فين هيحُط
واهي مشاوير وماشيينها
أشيلك يوم تشيلني دَهر
واهي دنيا في تَراحيلها
بَعتنا كتير لبطن القبر
لا مشاويرنا قطعناها
ولا التفاصيل بِتمحي المُرّ
أنا اليوم عِشت وسط الناس
وبُكره هروح مكان تاني
هتفتكروني يوم وخلاص
وييجي مكاني شيء تاني
يعيش وسط البشر برضه
يحابي ويجري على عرضُه
يعاند دَه ويعشق ده
ويزعل من برود وِدُه
وياخد باله م التفاصيل
تزيد تفاصيله من هَمُّـه
ينام عَيّان لا لاقي علاج
ولا هيرجع لحضن أُمُّه
ويمشي يروح مكان تاني
وبعد يومين وليهم ليل
ينام ويقوم وينسى الناس
لكن مدفون مع التفاصيل
جريدة الفكر الحر 