ارتجاله مشتركه بين الشاعر محمد جراحي و الشاعرة هناء مدكور

ارتجاله مشتركه بين الشاعر محمد جراحي و الكاتبة هناء مدكور

….
جراحي:
ما يتوحشك غير حبيبك
و لو الغياب ساعتين
و لا يتورب عنك و لا يسيبك
لو حتي ساكن فين
أما اللي جمبك و سايبك
و تمللي له أعذار
ده لا عمره حبك بقلبه
لو حتي جوه الدار
متسيبش قلبك مستباح
لكل واحد معدي
ياخد خضارك و روحك
و يمشي و لا مره يدي
…
هناء:
على قد شوقك أحبك
يا قلبي بطل جمايل
وإن يوم عطشت لمحبك
إشرب حروووف الرسايل
…
جراحي:
انا شوقي مش قد قَدِّك
و لا حِمل رد الجمايل
بس ان ضمن ربع وِدِك
لاجلك لَـ يعمل عمايل
…
هناء:
ياغريب وشايل في وشك
انا قلبي في حبه،، عيل
وحلفت إني ما غشك
بس انت ياحلو ميل،،
…
جراحي:
ميّلت علي جهد جهدي
و وصلت شايل محمِل
لعنيكي بكتب و بـ اهدي
و انا مهما هـعمل قُليِل
…
هناء:
ووصلت شايل محمل
اصل المحبه،، رسايل
بس انت أكتب،، وكمل
واللي في هواه حظه مايل
تشفي حروفه جراحي،،،*
…
جراحي:
اهو ده الكلام اللي ينفع
يتحط نجمه في سمايا
و ان كان كلامي هيشفع
هيكون لحَرفِـك مرايا
زارع هَنَـاه جوه راحي
…
هناء:
سايق عليك اما تزعل
هات الورق والدوايه
وتعالى نكتب ونغزل
على كف غزل الصبايا
داللي في عيونك تغزل
كمل فصول الروايه،،
…
جراحي:
ده لو الزعل ليك ياخدني
ازعل و اجيب ناس معايا
بس انت صوتك في ودني
اصل الفرح و الغوايه
و القرب منك يزيدني
عُمر فـ سطور الحكايه
…
هناء:
يا غلب غلبي في بعدك
ندر،، لجيلك،،، حفايااا
واحلف ووفي،،، بوعدك
واعمل نجومك مرااايه
ده اللي تلسع من صوابعك
يعشق صنوف الغوااايه
…
جراحي:
لا والله ما تخطي خطوه
غير خطوتك جوه روحي
يا نجمه عاليه يا راضيه
ازاي اسيبك تروحي
قربك هنا و دنيا هاديه
يا ساكنه سِري و بوحي