سلوى صبح تكتب
أنا ليكي

———————-__

أنا ليكي
————
أنا عايش فيكي
في ملامحِك..
في لحظة شوق مِنِّي ليكي..
في لمسة دفا كلها صدق
من إيديكي..
يا كل ما ليَّا..
أنا ليكي..
يامَّا إتمنيت تكوني نصيبي
يا سبب سعدي..
وأنا أفديكي..
بعمري وروحي وأداريكي
من كل الناس..
أتاريكي العالم اللي بحبه
بكل الحِّلو اللي فيكي..
يا بستان ورد بعبيره
ونسمة هوا صافية ورايقة
قلبي بيرفرف حواليكي..
طفلتي إنتي
أيوا بنتي
وأختي
وحبيبتي…
وساعات أمي..
والله عمري ما أوافيكي..
كل الخير كان جايلي بجد
على إيديكي..
واللقمة الحلوة طعمها
يبقى بس مِنِك..
يامَّا كلت صوابعي وراها
وبُست إيديكي..
والله يا غالية أنا بحبك ..
وأبيع الدُنيا وأشتريكي..
اسم الله عليكي وحواليكي
قمر إنما إيه
أحلى من البدر..
واللهِ البدر يغير مِنك..
وبيتغزِل في حُسنِك
في رشاق خطاويكي..
والناس بيحسدوني عليكي..
وبحب جِنانِك وشقاوتِك
وكلامك اللي بتقوله عنيكي..
لما تجادليني بعصبية
وتغيري وتخافي عليَّا
بكل الحُب بعرف إزاي أهدِّيكي..
إنتِ حبيبتي..
طمنِّي قلبك بس شوية
يا قدري الحِلو
ونصيبي الغالي
أنا ليكي..