سلوى صبح تكتب
رسالة إلى أمي

———————

رسالة إلى أمي
—————
صباح الخير يا غالية
ياللي مالية الكون عبير..
يا جميلة زي ما إنتِ
والسنين ما لها تأثير..
كل ما أكبر ببقى شبهِك
بس طبعًا إنتِ غير..
أصل يا ما إتعلمت مِنِك
يبقى قلبي زي طير..
طير يرفرف حُب دايمًا
ياللي قلبك كُله خِير..
يا بهية في غلاوتك
وعطاكِ كتير كتير..
لقمة من إيدك بتسند
ودعوتك هي الدليل..
وحنانك يا ما غطَّى همِّي
مهما كان كبير..
يصير مهما يصير يا أمي
إنتِ القلب الكبير..
إوعى ياما تزعلي مِنِّي
لو في مرة كلامي عاندِك
قلبي ساندِّك..
كُلِّي طُوعِك وأسير..
أسير لقلبٍ أم ضحِّت بعمرها
ووقفت ضد الأعاصير..
بكل قوة وعزم صادق
مش محتاج للتذكير..
أيوة بالحق يا أمي
أبويا كان بيحبك كتير..
زوجة حلوة كلامها غنوة
وأصيلة بنت خير..
وفي دعائي ليكي يا أمَّا
تعيشي بسعادة وعُمر طويل
بصحة دايمة وعافية جدًا
زي جِدر تم غرسُه في أرض صالحة
أصبح شجرة طارحة خير..