صفاء المنطاوي تكتب. تحية لكل أم

أنا كتبت لأمي كتير
ومهما كتبت فحقها في رقبتي كبير
المرة دي هكتب عن أي ام وأقول
مش علشان هي تستحق التقدير
دى واجب وحق وأي أم مكلفة بيه
بتحب ولادها وتتفانىٰ علشان تسعدهم
ومش مستنية غير راحة بالهم ورضا ربنا عنهم
الأم مش مجرد إسم أو لقب تاخد عليه وسام
الأم دي مؤسسة بدايتها الحنان ونهايتها أمان
اللي سهرت واللي داوت واللي جرت وراهم في كل مكان
اللي ماتت مليون مرة وقالت يارب ابني أو بنتي تعيش
اللي فرحت مع أول خطوة وأول كلمة وأول سِنه وأول ديل حصان .
اللي علمت ولادها إزاي يكتبوا الحروف
اللي وهم صغيرين كانت بتودي الدروس
بتّابع وتعافر كل ما تلاقي تقصير
والتقصير مش بس في التعليم
في الدين قبل كل شيء
علمتهم أول سورة وأول حديث
علمتهم يعني إيه جنة ونار
والفروض الخمسة والسنن من الصلوات
علمتهم الصواب والعقاب
وان النفس أمارة بالسوء قبل ما يغويها الشيطان
علمتهم أن طاعة ربنا أهم من طاعة الوالدين
علمتهم وراد انك تغلط بس ياريت التمادي يبقى هو آخر حل
علمتهم أن ربنا رحمة واسعة وأنه بيغفر الذنوب
الأم قدوة ومثل أعلى ولازم تكون من الصادقين
حتى لو بينت الأسوة كان قلبها بيبكي من غير ما حد يحس
الأم مدرسة من غير سور حتى لو كانت مبتعرفش تفك الخط
قلبها خط مليون جملة وحرف
دى العلما والشعرا كان أهلهم غاية في البساطة والفكر
لكن الحاسة السادسة كانت أقوى من السبورة والطباشير
دعمهم النفسي والمادي حتى لو هياكلوا عيش حاف
علشان يعلموا اولادهم كان الحافز في التغيير
الأم دى جبل مهما اهتز بيفضل ثابت علشان يشيل
جمل بيخزن علشان يعبر المسافات ويعديهم بر الأمان
الأم الدفا والغطا وقلبها مليان حنان وحضنها هو البيت
الأم مهما قلنا في حقها ف وارد التقصير في الفعل أو في الكلام. لأنها مهما قولنا فهي دورها في التنشئة كبير
الأم دى نعمة من غيرها الحياة ملهاش طعم
تحية لكل أم حبت ولادها وكانت نفسها آخر شيء تفكر فيه