سلوى صبح تكتب
آه يا قلبي المُلام

———-

آه يا قلبي المُلام
—————
آه يا قلبي يا متقطع
إيد تشيلك
وإيد تحطك
وياما الدنيا شالت وحطت عليك
وإزاي أداويك؟
بكلمة ولا بفعل
طب اديني عقل
في كل اللي حصل لك!!
فرحت يا يا خايب
بكلام الحبايب
وأتاريه يا هبلك
مجرد كلام
كلام والسلام
وفض مجالس
ولسه يا حايس
مكانك مكانك
كأنك خيال!!
خيال المآته
نصيبتك كبيرة
وقصصك كتيرة
وبرده مُلام!!
ما تيجي نحاول
نغير كل الكلام
ونرمي سلامنا
لكل اللي قطع عروقنا
وغرق هدومنا بدم انتقام
ونمشي
ما تمشي
وإيه لمًا تمشي
وتهرب كمان
وحاول تلاقي لقلبك مكان
وتزرع حواليه زهور السلام
وغصن الزتون
تشيله الحمام
وتهدى وتعقل
تمام
التمام
فاهمني يا خايب
خلاص خلص الكلام
سلام يا مُلام..