سلوى صبح تكتب
وشوشة

وشوشة
———-
بطمنك أنا لسة عايشة
في بُعدك وما مُوتش..
قلبي اللي مات من الوِحدة
عايش جوة قوقعتُه
وما خُوفتش..
عملتك الحبيب والصاحِب
في غُربِة دُنيتي القاسية
ما فاكرتِش..
بقولك إيه ؛
صحيح يا حبيبي طمنِّي
مجرد سؤال وعارفه إجابتُه
خنتني في بُعدِي ولا ما خونتش؟
بكل يقين جوايا
برد على سؤال غِيرتي عليك
عارفة إنك تخون نفسك
ولا تخون قلب
عايش كل حُب الدنيا فيك
حتى لو ما قُولتِش..
وعارِف إني مكدبتِش
في يوم عليك..
وما زعلتش
حتى لو كان عليك الحق
كنت خايفة أخسر
كل حُبي ليك
جريت كتير ولا تعبتش..
بحبك في غيابك أكتر
وما بالغتش
حقيقي شوقي ليك يوم عن يوم
بيكبر وبتحسَّر
وما فارقتش..
وعارف إنك بتتألم
ورغم الحُزن
عُمرك ما راح تستسلم
ومخلص ليَّا
ولو نساء الكون حواليك
وما ندمتش..
صعب الحكم على قلب إنسان
وإنتِ مجربتش..
وأنا جربت قلبك في البعاد والقرب
وزاد حُبِي فوق طاقتي
وما انهزمتش..
وشوشتك إنك حبيب العمر
أنا بحرك
وإنتَ في أعماقي غريق
ولا بتيأس
وبتعافِر بِكُلِ القوة
أد حُبي ليك وما غلبتِش..