قال إيه!
———-
قال إيه مخبية !
وعن كل الناس مدَّاريه!
وأنا حُبي فاض عن قلبي
وباين في عينيا..
مهو في الحقيقة
من غير مغالطه
أنا سمكة وإنتَ المَّيه..
وإن قلت أنا غير كده
أبقى كدابه !
ميه في المِيه!
لو يوم بتبقى بعيد
صعبة الحياة جدًا
الحياة من غيرك غبية
والله ده كتير عليا..
ولما بتقرب مني
في العين والنيني
بهدَّى أنا شوية
وبنسى كل أحزاني
اللي معبيَّة !
غريبة دي جدًا !
إن الحياة ما بيننا
بكل صعوبتها
مليانه حِنيه
متميزة جدًا
لو كنا حتى اتنين
أيوة صحيح عاشقين
لكننا واحد
بكل أخوية..
تقولشي رابطة دم
ولا ولاد العم
دي حاجة فِطرية..
عِشرة عظيمة جدًا
متمثلة طبعًا
في شربة المية
ولقمة هنيه
سبقها بسم الله
ودوبتها الآه
وهموم متتعدش
ومنين تلاقي زيي
ولا ألاقي زيك
محتاجة تفصيلة
وأنا على المقاس مظبوط
كل الكلام مغلوط
إلا الحُب – عنه مسكوت
يا أحلى هدية..
ونعمة ربنا عليا.