قلبي عندك ف “القوصية”
و أنا مرمي هناك بعيد
خدت منك جلابية
وعقل يمكن مش رشيد
طايره بيا ريح قوية
وزي ما ربك يريد
يمكن ارجع من عشية
ويمكن البعاد يزيد
ماشي مجهول الهوية
غصب عني شئ اكيد
عندي اهل عزاز عليا
عندي ليهم شوق شديد
عشرة حلوه يا بهية
تمر طايب ع الجريد
ناس عشانهم مش شوية
دمي يرخص ف الوريد
تكفي فرحتهم بجيي
حقي أقول عنهم واعيد
ما أنت لو مهمومة بيا
كنت فيكي هعيش سعيد
محمد ظريف يكتب قلبي عندك
جريدة الفكر الحر 