جراحي يكتب. – ضحكة النني –
يا مرحب بيكي
يا نبضة قلب مستنيها من سنوات
ياما ارحب روحي ليكي ماليها بالحكايات
لو العمر المسافر فوق جناح الريح يمن عليا بالوقت اللي راح مني
عشان استني جمبك لما اشوفك مره بالنني و يتبسم زَعَل روحي علي شفايفي،
و اسامحُه
أسامحه و يمشي وانتي في كفي، و يشوفني .. سعيد و الفرحه سايعه الكون و متساعنيش
ما انا الواد اللي روحُه قديمه قبل الكون
و وَسَع الكون مابيكفيش
لكنه ف لحظه لقي روحه بتتحول لصوت دقه.. و هي الدوم و التكه فـ نغَم نبضِك
يقول الناس دي حتةِ روح من ارواحنا انا و أُمك.. أكيد لأه..،
دي روحي جميعها بجناحها وتفاصيلها..
نوَت تفارقني من مده،
و متفقين أسرسبها ف عروق دَمِك.
فمتخليش كلام الناس يكسّر لِك جناح روحي ..
ده انا استحملت ظلم سنين، عشان يقدر يشيل حِملِك
فَلو جيتي..
و ملحقناش نكون مع بعض و اسمع ضحكتي منِك
لا تتضايقي
و لا تقولي مشي و سابني
انا لا يمكن أقايض حاجه بوجودك أو ابعد بالمكان عنك
لكن دي يا حبيبة قلبي سنة ربنا في الناس، لا فيها جاملني أو أجاملِك
و بعد سنين
هتلقي في ضهر عقلك حاجه بتنغمش و بتغلوش و بتضايقك
متتخضيش…
سبيها تزق و تعافر، سيبيها لحد ما تنبِـت
هتلقيها جناح روحي
و انا روحي يا روحي جناح هيبقي معاكي شئ مُخلص
في وقت الدنيا ما تخليكي تنكسري و تتكي علي عنيكي
هتلقي جناحي فيكي يقوم،
و يفرد نفسُه يحميكي
لا حد عزول يشوف دمعِك
و لا يشوف رعشه ف ايديكي
و يسند ضهرك المفرود و يرسم نظرة الواثق علي عنيكي
و يصرخ صرختي الهادرَه و يِخرِس مين يعاديكي
و يبقي مَدَق من سندس
تدوسي عليه برجليكي
و تمشي في سكتك هِيبَه
و طاقة نور من الرحمن تغطيكي
و لو أَذَن الزمان و مَنْ عليا بالوقت اللي راح مني
لَــ اكون لِك زاد و زُوَاده و راحْلَـه، يا ضحكة النني..
جريدة الفكر الحر 